እግዜር ያክብርልኝ!

ብሎጋችን 3 ወር ባልሞላ ግዜ ውስጥ ከመቶ ሃያ ሺህ ግዜ በላይ ተጎብኝታለች። ከዚህ ውስጥ ከግማሽ በላዩ ወደ ሀገር ቤት መግባት ከመከልከሏ በፊት በኢትዮጵያ የተጎበኘችው ነው። በነገራችን ላይ ይህ ቁጥር የአንጋፋይቱ ብሎጋችን ብቻ ነው “የተሰዉ” አስራ አምስቱን አያካትትም። በውጪም ሆነ በሀገር ውስጥ ያላችሁ ወዳጆቼ “ቢረባም ባይረባም እስቲ እንይለት” ብላችሁ ጨዋታዎቼን የተመለከታችሁልኝ በሙሉ እግዜር ያክብርልኝ።

አንዳንዶች በጨዋታዎቼ ብስጭት እያሉ “አሁንስ የቡና እና የአረቄ ጨዋታ አደረከው” ሲሉ ሊወቅሱኝ ሞክረዋል። እነዚህን ወዳጆቼን እላቸዋለሁ፤ “ፍሬንዶቼ” እኔ እኮ ከበፊቱም የአረቄ እና የቡና ወግ ነው ማውጋት የምፈለገው… እዝችው ላይ አረቄም ሆኑ ቡና “የጨዋ መጫወቻ” እንደሚባሉ ማስታወስ ይገባል።

ከበድ ጠለቅ ያሉ ትንታኔዎችን ፍለጋ ወደዚህ ብሎግ ከመጣችሁ ሰፈር ተሳስታችኋል ልላቸው እወዳለሁ።

እስከ አሁን ድረስ በብሎጋችን ላይ አስተያየት በመስጠት ግንባር ቀደም ቦታውን የያዘው ወዳጃችን በለው ሲሆን በትጋት 31 አስተያያየቶችን ሰጥቷል። በነገራችን ላይ ወዳጃችን በለው አስተያየት ብቻ ሳይሆን አንዳንድ ግዜ እኔ ያጎደልኩትን ሁሉ ነው የሚያሟላልን። እናም በይፋ ማመስገን ይገባል። ሽብር ሽብር ይላል፣ ቁልጭ እና ዮሴፍ የተበሉ ወዳጆቻችንም በብሎጋችን ላይ እያንዳንዳቸው ስምንት ስምንት ግዜ በአስተያየት ተሳትፎ አድርገዋል። እነሆ ምስጋናችሁን ውሰዱ…! ምርጥ ወርቅ፣ ኢትዮጵያዊ እና ሳሚ አልረሳኋችሁም እባካችሁ በአስተያየታችሁ ግፉበት!

በፌስ ቡክ፣ በኢሜል እና በስልክ “አይዞህ፣ በርታ፣ ከጎንህ ነን” እያላችሁ በርካታ ማበረታቻ፣ ምርቃት እና ውዳሴ ላቀረባችሁልኝ ወዳጆቼ ምስጋና አይበቃችሁም ግን ሌላ ከየት ይምጣ..!?

በመጨረሻም

“የፕሬስ ነፃነት በተከበረባት” ሀገር ከአስራ አምስት ግዜ በላይ በታታሪነት ብሎጌን ለዘጋችሁት “ዘጊዎች” ያደረጋችሁት በሙሉ ከአክብሮት የመጣ ነው ብዬ በማሰብ እግዜር ያክብርልኝ ልላችሁ ፈልጌ ነበር… ሳስበው ይሄ ሊያንሳችሁ ይችላልና ሌላ ምርቃት አፈላልግላችኋለሁ!

ለማንኛው ሰኞ ግንቦት ሃያን በዕለተ ቀኑ በሚዘክረው ጨዋታችን እስክንገናኝ ድረስ መልካም ሰንበት ይሁንልን ብንባባልስ!?

አሜን!

መልካም ሰንበት!